وہ خط کے پرزے اُڑا رہا تھا

وہ خط کے پرزے اُڑا رہا تھا
ہواؤں کا رخ دِکھا رہا تھا

بتاؤں کیسے وہ بہتا دریا
جب آ رہا تھا تو جا رہا تھا

کہیں مرا ہی خیال ہو گا
جو آنکھ سے گرتا جا رہا تھا

کچھ اور بھی ہو گیا نمایاں
میں اپنا لکھا مٹا رہا تھا

وہ جسم جیسے چراغ کی لَو
مگر دھواں دِل پہ چھا رہا تھا

منڈیر سے جھک کے چاند کل بھی
پڑوسیوں کو جگا رہا تھا

اسی کا ایماں بدل گیا ہے
کبھی جو میرا خدا رہا تھا

وہ ایک دن ایک اجنبی کو
مری کہانی سنا رہا تھا

وہ عمر کم کر رہا تھا میری
میں سال اپنا بڑھا رہا تھا

خدا کی شاید رضا ہو اس میں
تمہارا جو فیصلہ رہا تھا​

مٹی گریز کرنے لگی ہے خیال کر از علی زریون

مٹی گریز کرنے لگی ہے خیال کر

اپنا وجود اپنے لیے تو بحال کر

تیرا طلوع تیرے سوا تو کہیں نہیں

اپنے میں ڈوب اپنے ہی اندر زوال کر

اوروں کے فلسفے میں ترا کچھ نہیں چھپا

اپنے جواب کے لیے خود سے سوال کر

پہلے وہ لا تھا مجھ سے الٰہی ہوا ہے وہ

لایا ہوں میں خدا کو خودی سے نکال کر

اس کارگاہ عشق میں سمتوں کا دکھ نہ پال

فکر جنوب اور نہ خوف شمال کر

خواہش سے جیتنا ہے تو مت اس سے جنگ کر

چکھ اس کا ذائقہ اسے چھو کر نڈھال کر

آیا ہے پریم سے تو میں حاضر ہوں صاحبہ

لے میں بچھا ہوا ہوں مجھے پائمال کر

کتابیں جھانکتی ہیں بند الماری کے شیشوں سےبڑی حسرت سے تکتی ہیں

کتابیں جھانکتی ہیں بند الماری کے شیشوں سےبڑی حسرت سے تکتی ہیں
مہینوں اب ملاقاتیں نہیں ہوتیں
جو شامیں ان کی صحبت میں کٹا کرتی تھیں، اب اکثر
گزر جاتی ہیں کمپیوٹر کے پردوں پر
بڑی بے چین رہتی ہیں
انہیں اب نیند میں چلنے کی عادت ہو گئی ہے
بڑی حسرت سے تکتی ہیں
جو قدریں وہ سناتی تھیں۔۔۔ ۔
کہ جن کے سیل کبھی مرتے نہیں تھے
وہ قدریں اب نظر آتی نہیں گھر میں
جو رشتے وہ سناتی تھیں
وہ سارے ادھڑے ادھڑے ہیں
کوئی صفحہ پلٹتا ہوں تو اک سسکی نکلتی ہے
کئی لفظوں کے معنی گر پڑے ہیں
بنا پتوں کے سوکھے ٹنڈ لگتے ہیں وہ سب الفاظ
جن پر اب کوئی معنی نہیں اگتے
بہت سی اصطلاحیں ہیں۔۔۔ ۔
جو مٹی کے سکوروں کی طرح بکھری پڑی ہیں
گلاسوں نے انہیں متروک کر ڈالا
زباں پہ ذائقہ آتا تھا جو صفحے پلٹنے کا
اب انگلی کلک کرنے سے بس اک
جھپکی گزرتی ہے۔۔۔ ۔۔
بہت کچھ تہ بہ تہ کھلتا چلا جاتا ہے پردے پر
کتابوں سے جو ذاتی رابطہ تھا، کٹ گیا ہے
کبھی سینے پہ رکھ کے لیٹ جاتے تھے
کبھی گودی میں لیتے تھے
کبھی گھٹنوں کو اپنے رحل کی صورت بنا کر
نیم-سجدے میں پڑھا کرتے تھے، چھوتے تھے جبیں سے
خدا نے چاہا تو وہ سارا علم تو ملتا رہے گا بعد میں بھی
مگر وہ جو کتابوں میں ملا کرتے تھے سوکھے پھول
کتابیں مانگنے، گرنے، اٹھانے کے بہانے رشتے بنتے تھے
ان کا کیا ہو گا
وہ شاید اب نہیں ہوں گے​

اے جذبۂ دل گر میں چاہوں ہر چیز مقابل آ جائے

اے جذبۂ دل گر میں چاہوں ہر چیز مقابل آ جائے

منزل کے لیے دو گام چلوں اور سامنے منزل آ جائے

آتا ہے جو طوفاں آنے دے، کشتی کا خدا خود حافظ ہے

مشکل تو نہیں ان موجوں میں خود بہتا ہوا ساحل آ جائے

اے شمع، قسم پروانوں کی، اتنا تُو میری خاطر کرنا

اس جذبۂ دل کے بارے میں اک مشورہ تم سے لیتا ہوں

اس وقت مجھے کیا لازم ہے جب تم پہ میرا دل آ جائے

اے رہبرِ کامل چلنے کو تیار تو ہوں بس یاد رہے

اس وقت مجھے بھٹکا دینا جب سامنے منزل آ جائے

اس عشق میں جاں کو کھونا ہے، ماتم کرنا ہے، رونا ہے

میں جانتا ہوں جو ہونا ہے، پر کیا کروں جب دل آ جائے

ہاں یاد مجھے تم کر لینا، آواز مجھے تم دے لینا

اس راہِ محبت میں کوئی درپیش جو مشکل آ جائے

اے دل کی خلش چل یونہی سہی، چلتا تو ہوں ان کی محفل میں

اس وقت مجھے چونکا دینا جب رنگ پہ محفل آ جائے

کرید

کرید

جی چاہے کہ

پتھر مار کے سورج ٹکڑے ٹکڑے کردوں

سارے فلک پر بکھرا دوں‌اس کانچ کے ٹکڑے

جی چاہے کہ

لمبی ایک کمند بنا کر

دور افق پر ہُک لگاؤں

کھینچ کے چادر چیر دوں ساری

جھانک کے دیکھوں پیچھے کیا ہے

شاید کوئی اور فلک ہو!

معنی کا عذاب

معنی کا عذاب

چوک سے چل کر، منڈی اور بازار سے ہوکر

لال گلی سے گزری ہے کاغذ کی کشتی

بارش کے لاوارث پانی پر بیٹھی بیچاری کشتی

شہر کی آوارہ گلیوں میں سہمی سہمی گھوم رہی ہے

پوچھ رہی ہے

ہر کشتی کا ساحل ہوتا ہے تو کیا میرا بھی کوئی ساحل ہوگا

بھولے بھالے اک بچے نے

بے معنی کو معنی دے کر

ردی کے کاغذ پر کیسا ظلم کیا ہے

میرا خاموش رہ کر بھی انہیں سب کچھ سنا دینا

میرا خاموش رہ کر بھی انہیں سب کچھ سنا دینا

زباں سے کچھ نہ کہنا دیکھ کر آنسو بہا دینا

میں اس حالت سے پہنچا حشر والے خود پکار اٹھے

کوئی فریاد کرنے آ رہا ہے راستہ دینا

اجازت ہو تو کہ دوں قصۂ الفت سرِ محفل

مجھے کچھ تو فسانہ یاد ہے کچھ تم سنا دینا

میں مجرم ہوں مجھے اقرار ہے جرمِ  محبت کا

مگر پہلے خطا پر غور کر لو پھر سزا دینا

قمرؔ وہ سب سے چھپ کر آ رہے ہیں فاتحہ پڑھنے

کہوں کس سے کہ میری شمعِ تربت کو بجھا دینا

مجھ کو شبِ وجود میں تابش خواب چاہیے

مجھ کو شبِ وجود میں تابش خواب چاہیے

شوقِ خیال تازہ ہے یعنی عذاب چاہیے

آج شکستِ ذات کی شام ہے مجھ کو آج شام

صرف شراب چاہیے ، صرف شراب چاہیے

کچھ بھی نہیں ہے ذہن میں کچھ بھی نہیں سو اب مجھے

کوئی سوال چاہیے کوئی جواب چاہیے

اس سے نبھے گا رشتۂ سود و زیاں بھی کیا بھلا

میں ہوں بلا کا بدحساب اس کو حساب چاہیے

امن و امانِ شہرِ دل خواب و خیال ہے ابھی

یعنی کہ شہر دل کا حال اور خراب چاہیے

جانِ گماں ہمیں تو تم صرف گمان میں رکھو

تشنہ لبی کو ہر نفس کوئی سراب چاہیے

کھل تو گیا ہے دل میں ایک مکتبِ حسرت و امید

جونؔ اب اس کے واسطے کوئی نصاب چاہیے

بھلا کیا پڑھ لیا ہے اپنے ہاتھوں کی لکیروں میں

بھلا کیا پڑھ لیا ہے اپنے ہاتھوں کی لکیروں میں

کہ اس کی بخششوں کے اتنے چرچے ہیں فقیروں میں

کوئی سورج سے سیکھے، عدل کیا ہے، حق رسی کیا ہے

کہ یکساں دھوپ بٹتی ہے، صغیروں میں کبیروں میں

ابھی غیروں کے دکھ پہ بھیگنا بھولی نہیں آنکھیں

ابھی کچھ روشنی باقی ہے لوگوں گے ضمیروں میں

نہ وہ ہوتا، نہ میں اِک شخص کو دل سے لگا رکھتا

میں دشمن کو بھی گنتا ہوں محبت کے سفیروں میں

سبیلیں جس نے اپنے خون کی ہر سو لگائی ہوں

میں صرف ایسے غنی کا نام لکھتا ہوں امیروں میں

بدن آزاد ہے، اندر میرے زنجیر بجتی ہے

کہ میں مختار ہو کر بھی گنا جاؤں اسیروں میں

ٹھہری ٹھہری ہوئی طبیعت میں روانی آئی​

ٹھہری ٹھہری ہوئی طبیعت میں روانی آئی​

آج پھر یاد محبت کی کہانی آئی​

​

آج پھر نیند کو آنکھوں سے بچھڑتے دیکھا​

آج پھر یاد کوئی چوٹ پرانی آئی​

​

مدّتوں بعد چلا اُن پہ ہمارا جادو​

مدّتوں بعد ہمیں بات بنانی آئی​

​

مدّتوں بعد پشیماں ہوا دریا ہم سے​

مدّتوں بعد ہمیں پیاس چُھپانی آئی​

​

مدّتوں بعد کھُلی وسعتِ صحرا ہم پر​

مدّتوں بعد ہمیں خاک اُڑانی آئی​

​

مدّتوں بعد میسر ہوا ماں کا آنچل​

مدّتوں بعد ہمیں نیند سُہانی آئی​

​

اتنی آسانی سے ملتی نہیں فن کی دولت​

ڈھل گئی عمر تو غزلوں پہ جوانی آئی​

انشا جی کیا بات بنے گی ہم لوگوں سے دور ہوئے

انشا جی کیا بات بنے گی ہم لوگوں سے دور ہوئے

ہم کس دل کا روگ ہوئے ، کس سینے کا ناسور ہوئے

بستی بستی آگ لگی تھی ، جلنے پر مجبور ہوئے

رندوں میں کچھ بات چلی تھی شیشے چکنا چور ہوئے

لیکن تم کیوں بیٹھے بیٹھے آہ بھری رنجور ہوئے

اب تو ایک زمانہ گزرا تم سے کوئی قصور ہوئے

اے لوگو کیوں بھولی باتیں یاد کرو ، کیا یاد دلاؤ

قافلے والے دور گئے ، بجھنے دو اگر بجھتا ہے الاؤ

ایک موج سے رک سکتا ہے طوفانی دریا کا بہاؤ

سمے سمے کا اک راگ ہے ، سمے سمے کا اپنا بھاؤ

آس کی اجڑی پھلواری میں یادوں کے غنچے نہ کھلاؤ

پچھلے پہر کے اندھیارے میں کافوری شمعیں نہ جلاؤ

انشا جی وہی صبح کی لالی ۔ انشا جی وہی شب کا سماں

تمہی خیال کی جگر مگر بھٹک رہے ہو جہاں تہاں

وہی چمن وہی گل بوٹے ہیں وہی بہاریں وہی خزاں

ایک قدم کی بات ہے یوں تو روپہلے خوابوں کا جہاں

لیکن دور افق دیکھو لہراتا گھنگھور دھواں

بادل بادل امڈ رہا ہے سہج سہج پیچاں پیچاں

منزل دور دکھے تو راہی رہ میں بیٹھ سستائے

ہم بھی تیس برس کے ماندے یونہی روپ نگر ہو آئے

روپ نگر کی راج کماری سپنوں میں آئے بہلائے

قدم قدم پہ مدماتی مسکان بھیرے ہاتھ نہ آئے

چندرما مہراج کی جیوتی تارے ہیں آپس میں چھپائے

ہم بھی گھوم رہے ہیں لے کر کاسہ انگ بھبھوت رمائے

جنگل جنگل گھوم رہے ہیں رمتے جوگی سیس نوائے

تم پریوں کے راج دلارے تم اونچے تاروں کے کوی

ہم لوگوں کے پاس یہی اجڑا انبر ، اجڑی دھرتی

تو تم اڑن کھٹولے لے کر پہنچو تاروں کی نگری

ہم لوگوں کی روح کمر تک دھرتی کی دلدل میں پھنسی

تم پھولوں کی سیجیں ڈھونڈو اور ندیا سنگیت بھری

ہم پت جھڑ کی اجڑی بیلیں زرد زرد الجھی الجھی

ہم وہ لوگ ہیں گنتے تھے تم کل تک جن کو پیاروں میں

حال ہمارا سنتے تھے تو لوٹتے تھے انگاروں میں

آج بھی کتنے ناگ چھپے ہیں دشمن کے بمباروں میں

آتے ہیں نیپام اگلتے وحشی سبزہ زاروں میں

آہ سی بھر کے رہ جاتے ہو بیٹھ کے دنیا داروں میں

حال ہمارا چھپتا ہے جب خبروں میں اخباروں میں

اوروں کی تو باتیں چھوڑو ، اور تو جانے کیا کیا تھے

رستم سے کچھ اور دلاور بھیم سے بڑھ کر جودھا تھے

لیکن ہم بھی تند بپھرتی موجوں کا اک دھارا تھے

انیائے کے سوکھے جنگل کو جھلساتی جوالا تھے

نا ہم اتنے چپ چپ تھے تب، نا ہم اتنے تنہا تھے

اپنی ذات میں راجا تھے ہم اپنی ذات میں سینا تھے

طوفانوں کا ریلا تھے ہم بلوانوں کی سینا تھے

دل ٹھہرنے دے تو آنکھیں بھی جھپکتے جاویں

دل ٹھہرنے دے تو آنکھیں بھی جھپکتے جاویں

ہم کہ تصویر بنے بس تجھے تکتے جاویں

چوبِ نم خوردہ کی مانند سلگتے رہے ہم

نہ تو بجھ پائیں نہ بھڑکیں نہ دہکتے جاویں

تیری بستی میں تیرا نام پتہ کیا پوچھا

لوگ حیران و پریشان ہمیں تکتے جاویں

کیا کرے چارہ کوئی جب ترے اندوہ نصیب

منہ سے کچھ بھی نہ کہیں اور سسکتے جاویں

کوئی نشے سے کوئی تشنہ لبی سے ساقی

تری محفل میں سبھی لوگ بہکتے جاویں

کبھی اس یارِسمن بر کے سخن بھی سنیو

ایسا لگتا ہے کہ غنچے سے چٹکتے جاویں

ہم نوا سنجِ محبّت ہیں ہر ایک رُت میں فراز

وہ قفس ہو کہ گلستاں ہو ، چہکتے جاویں

اسے بچائے کوئی کیسے ٹوٹ جانے سے

اسے بچائے کوئی کیسے ٹوٹ جانے سے

وہ دل جو باز نہ آئے فریب کھانے سے

وہ شخص ایک ہی لمحے میں ٹوٹ پھوٹ گیا

جسے تراش رہا تھا میں اک زمانے سے

رکی رکی سی نظر آ رہی ہے نبضِ حیات

یہ کون اٹھ کے گیا ہے میرے سرہانے سے

نہ جانے کتنے چراغوں کو مِل گئی شہرت

اک آفتاب کے بے وقت ڈوب جانے سے

اداس چھوڑ گیا وہ ہر اک موسم کو

گلاب کِھلتے تھے کل جس کے مسکرانے سے

تجھ کو دیکھا ھے جو دریا نے ادھر آتے ھوئے

تجھ کو دیکھا ہے جو دریا نے ادھر آتے ہوئے

کچھ بھنور ڈوب گئے پانی میں چکراتے ہوئے

ہم نے تو رات کو دانتوں سے پکڑ رکھا ہے

چھینا جھپٹی میں افق کھلتا گیا جاتے ہوئے

جھپ سے پانی میں اتر جاتی ہے گلنار شفق

سرخ ہو جاتے ہیں رخساربھی،شرماتے ہوئے

میں نہ ہوں گا تو خزاں کیسے کٹے گی تیری

شوخ پتے نے کہا شاخ سے،مرجھاتے ہوئے

حسرتیں اپنی بلکتیں نہ یتیموں کی طرح

ہم کو آواز ہی دے لیتے ذرا، جاتے ہوئے