بند باہر سے، مِری ذات کا دَر ہے مُجھ میں

بند باہر سے، مِری ذات کا دَر ہے مُجھ میں

میں نہیں خُود میں، یہ اِک عام خبر ہے مُجھ میں

اِک عَجَب آمد و شُد ہے کہ، نہ ماضی ہے نہ حال

جونؔ ! بَرپا کئی نسلوں کا سفر ہے مُجھ میں

ہے مِری عُمر جو حیران تماشائی ہے !

اور اِک لمحہ ہے، جو زیر و زبر ہے مُجھ میں

کیا ترستا ہُوں کہ، باہر کے کسی کام آئے !

وہ اِک انبوہ کہ بس، خاک بسر ہے مُجھ میں

ڈوبنے والوں کے دریا مِلے پایاب مُجھے

اُس میں، اب ڈوب رہا ہُوں، جو بھنور ہے مُجھ میں

دَر و دِیوار تو باہر کے ہیں ڈھینے والے

چاہے رہتا نہیں میں، پر مِرا گھر ہے مُجھ میں

میں جو پیکار میں اندر کی ہُوں بے تیغ و زِرہ

آخرش کون ہے؟ جو سِینہ سِپر ہے مُجھ میں

معرکہ گرم ہے بے طَور سا کوئی ہر دَم !

نہ کوئی تیغ سلامت، نہ سِپر ہے مُجھ میں

زخم ہا زخم ہُوں، اور کوئی نہیں خُوں کا نِشاں !

کون ہے وہ؟ جو مِرے خون میں تر ہے مُجھ میں

بشکریہ اردو محفل

کیا ہے ترکِ دنیا کاہلی سے

کیا ہے ترکِ دنیا کاہلی سے

ہمیں حاصل نہیں بے حاصلی سے

خراجِ دیہہِ ویراں، یک کفِ خاک

بیاباں خوش ہوں تیری عاملی سے

پرافشاں ہو گئے شعلے ہزاروں

رہے ہم داغ، اپنی کاہلی سے

خدا، یعنی پدر سے مہرباں تر

پھرے ہم در بدر ناقابلی سے

اسؔد قربانِ لطفِ جورِ بیدل

خبر لیتے ہیں، لیکن بیدلی سے

ساری خلقت ایک طرف تھی اور دوانہ ایک طرف

ساری خلقت ایک طرف تھی اور دوانہ ایک طرف

تیرے لیے میں پاؤں پہ اپنے جم کے  کھڑا تھا ایک طرف

ایک اک کر کے ہر منزل کی سمت ہی بھول رہا تھا میں

دھیرے دھیرے کھینچ رہا تھا تیرا رشتہ ایک طرف

دونوں سے میں بچ کر تیرے خواب و خیال سے گزر گیا

دل کا صحرا ایک طرف تھا آنکھ کا دریا ایک طرف

آگے آگے بھاگ رہا ہوں اب وہ میرے پیچھے ہے

اک دن تیری چاہ میں کی تھی میں نے دنیا ایک طرف

دوسری جانب اک بادل نے بڑھ کر ڈھانپ لیا تھا چاند

اور آنکھوں میں ڈوب رہا تھا دل کا ستارا ایک طرف

وقت جواری کی بیٹھک میں جو آیا سو ہار گیا

اختؔر اک دن میں بھی دامن جھاڑ کے نکلا ایک طرف