میں نے کس شوق سے اِک عمر غزل خوانی کی

میں نے کس شوق سے اِک عمر غزل خوانی کی

کتنی گہری ہیں لکیریں میری پیشانی کی

وقت ہے میرے تعاقب میں چھپا لے مجھ کو

جوئے کم آب!قسم تجھ کو ترے پانی کی

یُوں گزرتی ہے رگ و پے سے تری یاد کی لہر

جیسے زنجیر چھنک اُٹھتی ہے زندانی کی

اجنبی سے نظر آئے ترے چہرے کے نقوش

جب ترے حُسن پہ میں نے نظرثانی کی

مجھ سے کہتا ہے کوئی،آپ پریشاں نہ ہوں

مری زلفوں کو تو عادت ہے پریشانی کی

زندگی کیا ہے؟طلسمات کی وادی کا سفر

پھر بھی فرصت نہیں ملتی مجھے حیرانی کی

وہ بھی تھے ذکر بھی تھا رنگ غزل کا شبنؔم

پھر تو میں نے سر ِ محفل وہ گل افشانی کی

شبنؔم رومانی

گِن گِن تارے لنگھدیاں راتاں

گِن گِن تارے لنگھدیاں راتاں

سپّاں وانگر ڈنگدیاں راتاں

رانجھا تخت ہزارہ بُھلیا

بُھلیا ں نئیں پر جھنگ دیاں راتاں

اکھیاں وچ جگراتے رہندے

سُولی اُتے ٹنگدیاں راتاں

ہور کسے ول جان ناں دیون

اپنے رنگ وِچ رنگدیاں راتاں

مینوں کوئی سمجھ  ناں آوے

آئیاں کہدے ڈھنگ  دیاں راتاں

برؔی نظامی یاد نئیں مینوں

ہُن خورے کی منگدیاں راتاں

ہجر میں اُن کی ہُوا ایسا میں بیمار کہ بس

ہجر میں اُن کی ہُوا ایسا میں بیمار کہ بس

روزِ رحلت پہ کہَیں سب مِرے غمخوار کہ بس

خُوگرِ غم ہُوا اِتنا، کہ بُلانے پر بھی !

خود کہَیں مجھ سے اب اِس دہر کے آزار کہ بس

حالِ دِل کِس کو سُناؤں، کہ شُروعات ہی میں

کہہ اُٹھیں جو بھی بظاہر ہیں مِرے یار کہ بس

کیا زمانہ تھا دھڑکتے تھے بیک رنگ یہ جب

درمیاں دِل کے اُٹھی یُوں کوئی دیوار کہ بس

بارہا، در سے اُٹھانے پہ دوبارہ تھا وہیں !

میں رہا دِل سے خود اپنے ہی یُوں ناچار کہ بس

اِک خوشی کی بھی نہیں بات سُنانے کو خلِش 

گُذرے ایسے ہیں مِری زیست کے ادوار کہ بس

ادا شناس ترا بےزباں نہیں ہوتا

ادا شناس ترا بےزباں نہیں ہوتا

کہے وہ کس سے کوئی نکتہ داں نہیں ہوتا

سب ایک رنگ میں ہیں مے کدے کے خورد و کلاں

یہاں تفاوت پیر و جواں نہیں ہوتا

قمار عشق میں سب کچھ گنوا دیا میں نے

امید نفع میں خوف زیاں نہیں ہوتا

سہم رہا ہوں میں اے اہل قبر بتلا دو

زمیں تلے تو کوئی آسماں نہیں ہوتا

وہ محتسب ہو کہ واعظ وہ فلسفی ہو کہ شیخ

کسی سے بند ترا راز داں نہیں ہوتا

وہ سب کے سامنے اس سادگی سے بیٹھے ہیں

کہ دل چرانے کا ان پر گماں نہیں ہوتا

جو آپ چاہیں کہ لے لیں کسی کا مفت میں دل

تو یہ معاملہ یوں مہرباں نہیں ہوتا

جہاں فریب ہو مجذوبؔ یہ تری صورت

بتوں کے عشق کا تجھ پر گماں نہیں ہوتا

خواجہ عزیز الحسن مجذؔوب