کوئی محرم راز نی مل دا

کیا حال سناواں دل دا

کوئی محرم راز نی مل دا

منہ دُھوڑ ، مٹی سِر پایُم۔ سارا ننگ نمُوذ ونجایُم

کوئی پُچھن نہ ویہڑے آیا، ہتھوں اُلٹا عالم کِھلدا

کوئی محرم راز نی مِلدا

آیا بار برہوں سر بھاری, لگی ہو ، ہو شہر خواری

اونجیں عمر گزاریُم ساری، نہ پایُم ڈس منزل دا

کوئی محرم راز نی ملدا

 دل یار کیتے کُر لاوے, تڑ پھاوے تے غم کھاوے

ڈکھ پاوے سول نبھاوے, ایہو طور تیڈے بیدل دا

کوئی محرم راز نی ملدا

کئی سہنس طبیب کماون, سے پڑیاں جھول پلاون

میڈے دلا دا بھید نہ پاون, پووے فرق نہیں ہک تِل دا

کوئی محرم راز نی ملدا

پُنوں ہود نہ کھڑ مکلایا۔ چھڈ کلھڑی کیچ سدھایا

سوہنے جان، پچھان بھلایا، کُوڑا عذر نبھایُم گِھل دا

کوئی محرم راز نی ملدا

سن لیلیٰ دیہانہہ پکارے, تیڈا مجنوں زار نزارے

سوہنا یار تو نے ہک وارے, کڈیں چا پردہ محمل دا

کوئی محرم راز نی ملدا

دل پریم نگر دوں تانگھے، جتھاں پینڈے سخت اڑانگے

نہ یار فرید ؔ نہ لانگھے، ہے پندھ بہوں مشکل دا

کوئی محرم راز نی ملدا