ہم جیسے تیغ ظلم سے ڈر بھی گئے تو کیا

ہم جیسے تیغ ظلم سے ڈر بھی گئے تو کیا

کچھ وہ بھی ہیں جو کہتے ہیں سر بھی گئے تو کیا

اٹھتی رہیں گی درد کی ٹیسیں تمام عمر

ہیں زخم تیرے ہاتھ کے بھر بھی گئے تو کیا

ہیں کون سے بہار کے دن اپنے منتظر

یہ دن کسی طرح سے گزر بھی گئے تو کیا

اک مکر ہی تھا آپ کا ایفائے عہد بھی

اپنے کہے سے آج مکر بھی گئے تو کیا

ہم تو اسی طرح سے پھریں گے  خراب حال

یہ شعر تیرے دل میں اتر بھی گئے تو کیا

باصؔر تمہیں یہاں کا ابھی تجربہ نہیں

بیمار ہو؟ پڑے رہو، مر بھی گئے تو کیا

دوریاں مٹ جائیں گی اور فاصلہ رہ جائے گا

دوریاں مٹ جائیں گی اور فاصلہ رہ جائے گا

ختم ہو جائیں گے رشتے ، رابطہ رہ جائے گا

کرکرا ہو جائے گا میٹھا مزہ الفاظ کا

تلخ لہجے کا زباں پر ذائقہ رہ جائے گا

جھوٹ اک دن بولنے لگ جائیں گی آنکھیں سبھی

اور منہ تکتا ہمارا آئنہ رہ جائے گا

منزلیں بڑھ کر مسافر کے گلے لگ جائیں گی

پاؤں چھونے کو ترستا راستہ رہ جائے گا

بھول جائے گا ہمیں ہر گنگناتا واقعہ

حافظے میں کلبلاتا حادثہ رہ جائے گا

یوں بدن میں بے حسی بیگانگی بس جائے گی

روح سے بھی واجبی سا واسطہ رہ جائے گا

عام ہو جائے گا اتنا سرد مہری کا چلن

منجمد ہو کر خوشی کا قہقہہ رہ جائے گا

ایک نقطے کی کمی عاجزؔ کہیں رہ جائے گی

نامکمل دوستی کا دائرہ رہ جائے گا

ایک خواب

ایک خواب

ایک ہی خواب کئی بار یوں ہی دیکھا ہے میں نے

تو نے ساڑی میں اڑس لی ہیں مری چابیاں گھر کی

اور چلی آئی ہے بس یوں ہی مرا ہاتھ پکڑ کر

گھر کی ہر چیز سنبھالے ہوئے اپنائے ہوئے تو

تو مرے پاس مرے گھر پہ مرے ساتھ ہے سونوںؔ

میز پر پھول سجاتے ہوئے دیکھا ہے کئی بار

اور بستر سے کئی بار جگایا بھی ہے تجھ کو

چلتے پھرتے ترے قدموں کی وہ آہٹ بھی سنی ہے

گنگناتی ہوئی نکلی ہے غسل خانے سے جب بھی

اپنے بھیگے ہوئے بالوں سے ٹپکتا ہوا پانی

میرے چہرے پر چھڑک دیتی ہے تو سونوںؔ کی بچی

فرش پر لیٹ گئی ہے تو کبھی روٹھ کے مجھ سے

اور کبھی فرش سے مجھ کر بھی اٹھا یا ہے منا کر

تاش کے پتوں پہ لڑتی ہے کبھی کھیل میں مجھ سے

اور کبھی لڑتی بھی ایسے ہے کہ بس کھیل رہی ہے

اور آغوش میں ننھے کو

اور معلوم ہے جب دیکھا تھا یہ خواب تمہارا

اپنے بسترپہ میں اس وقت پڑا جاگ رہا تھا