شیشے دلوں کے گردِ تعصب سے اَٹ گئے

شیشے دلوں کے گردِ تعصب سے اَٹ گئے

روشن دماغ لوگ بھی فرقوں میں بٹ گئے

اظہار کا دباؤ بڑا ہی شدید تھا

الفاظ روکتے ہی مرے ہونٹ پھٹ گئے

بارش کو دشمنی تھی فقط میری ذات سے

جونہی مرا مکان گرا ، اَبر چَھٹ گئے

دھرتی پہ اُگ رہی ہیں فلک بوس چمنیاں

جن سے فضائیں عطر تھیں وہ پیڑ کٹ گئے

سپرا پڑوس میں نئی تعمیر کیا ہوئی

میرے بدن کے رابطے سورج سے کٹ گئے

بیٹے کو سزا دے کے عجب حال ہوا ہے

بیٹے کو سزا دے کے عجب حال ہوا ہے

دل پہروں مرا کرب کے دوزخ میں جلا ہے

عورت کو سمجھتا تھا جو مردوں کا کھلونا

اس شخص کو داماد بھی ویسا ہی ملا ہے

ہر اہل ہوس جیب میں بھر لایا ہے پتھر

ہمسا ئے کی بیری پہ ابھی بور پڑا ہے

اب تک میرے اعصاب پہ محنت ہے مسلط

اب تک میرے کانوں میں مشینوں کی صدا ہے

اے رات !مجھے ماں کی طرح گود میں لے لے

دن بھر کی مشقت سے بدن ٹوٹ رہا ہے

شاید میں غلط دور میں اترا ہوں زمیں پر

ہر شخص تحیر سے مجھے دیکھ رہا ہے

اطراف میں باریش بزرگوں کا ہے پہرا

اور بیچ میں سہما ہوا تنویر کھڑا ہے