ایک مہرے کا سفر

جب وہ کم عمر ہی تھا

اس نے یہ جان لیا تھا کہ اگر جِینا ہے

بڑی چالاکی سے جِینا ہو گا

آنکھ کی آخری حد تک ہے بساطِ ہستی

اور وہ معمولی سا اِک مُہرہ ہے

ایک اک خانہ بہت سوچ کے چلنا ہو گا

بازی آسان نہیں تھی اس کی

دُور تک چاروں طرف پھیلے تھے

مُہرے

جَلّاد

نہایت سَفّاک

سخت بے رحم

بہت ہی چالاک

اپنے قبضے میں لئے

پوری بِساط

اس کے حصّے میں فقط مات لئے

وہ جِدھر جاتا

اسے مِلتا تھا

ہر نیا خانہ نئی گھات لئے

وہ مگر بچتا رہا

چلتا رہا

ایک گھر

دوسرا گھر

تیسرا گھر

پاس آیا کبھی اَوروں کے

کبھی دُور ہوا

وہ مگر بچتا رہا

چلتا رہا

گو کہ معمولی سا مُہرہ تھا مگر جیت گیا

یوں وہ اک روز بڑا مُہرہ بَنا

اب وہ محفوظ ہے اِک خانے میں

اتنا محفوظ کہ دشمن تو الگ

دوست بھی پاس نہیں آ سکتے

اُس کے اِک ہاتھ میں ہے جیِت اُس کی

دوسرے ہاتھ میں تنہائی ہے

درد کے پھول بھی کھلتے ہیں بکھر جاتے ہیں

درد کے پھول بھی کھلتے ہیں بکھر جاتے ہیں

زخم کیسے بھی ہوں کچھ روز میں بھر جاتے ہیں

چھت کی کڑیوں سے اُترتے ہیں مرے خواب مگر

میری دیواروں سے ٹکراکے بکھر جاتے ہیں

اس دریچے میں بھی اب کوئی نہیں اور ہم بھی

سر جھکائے ہوئے چپ چاپ گزر جاتے ہیں

راسته روکے کھڑی ہے یہی الجھن کب سے

کوئی پوچھے تو کہیں کیا کہ کدھر جاتے ہیں

نرم آواز، بھلی باتیں، مہذب لہجے

پہلی بارش میں ہی یہ رنگ اُتر جاتے ہیں

ہمارے شوق کی یہ انتہا تھی

ہمارے شوق کی یہ انتہا تھی

قدم رکھا کہ منزل راستہ تھی

بچھڑ کے ڈار سے بَن بَن پِھرا وہ

ہرن کو اپنی کستوری سزا تھی

کبھی جو خواب تھا وہ پا لیا ہے

مگر جو کھو گئی وہ چیز کیا تھی

میں بچپن میں کھلونے توڑتا تھا

میرے انجام کی وہ ابتدا تھی

محبّت مر گئی مجھ کو بھی غم ہے

میرے اچھے دنوں کی آشنا تھی

جسے چُھو لوں میں وہ ہو جائے سونا

تجھے دیکھا تو جانا بددعا تھی

مریضِ خواب کو تو اب شفا ہے

مگر دنیا بڑی کڑوی دوا تھی

میرے مخالف نے چال چل دی ہے

میرے مخالف نے چال چل دی ہے
اور اب میری چال کے انتظار میں ہے
مگر میں کب سے
سفید خانوں، سیاہ خانوں میں رکھے
کالے سفید مہروں کو دیکھتا ہوں
میں سوچتا ہوں یہ مہرے کیا ہیں
اگر میں سمجھوں کے یہ جو مہرے ہیں صرف لکڑی کے ہیں کھلونے
تو جیتنا کیا ہے ہارنا کیا
نہ یہ ضروری نہ وہ اہم ہیں
اگر خوشی ہے نہ جیتنے کی نہ ہارنے کا ہی کوئی غم ہے
تو کھیل کیا ہے
میں سوچتا ہوں جو کھیل نہ ہے تو اپنے دل میں یقین کر لوں
یہ مہرے سچ مچ ہیں بادشاہ و وزیر و پیادے 
اور انکے آگے ہے دشمنوں کے وہ فوج
رکھتی ہے جو مجھکو تباہ کرنے کے سارے منصوبے سب ارادے
مگر میں ایسا جو مان بھی لوں
تو سوچتا ہوں یہ کھیل کب ہے
یہ جنگ ہے جس کو جیتنا ہے
یہ جنگ ہے جس میں سب ہے جائز
کوئی یہ کہتا ہے جیسے مجھ سے
یہ جنگ بھی ہے، یہ کھیل بھی ہے
یہ جنگ ہے پر کھلاڑیوں کی
یہ کھیل ہے جنگ کی وضع کا
میں سوچتا ہوں جو کھیل ہے یہ
تو اس میں اس طرح کا اصول کیوں ہے 
کہ کوئی مہرہ رہے کے جائے
مگر جو ہے بادشاہ اس پر کبھی کوئی آنچ نہ آے
وزیر ہی کو ہے بس اجازت کہ جس طرف بھی وہ چاہے جائے 
میں سوچتا ہوں جو کھیل ہے یہ
اس میں اس طرح کا اصول کیوں ہے 
کہ پیادہ جو اپنے گھر سے نکلے پلٹ کر واپس نہ جانے پاے
میں سوچتا ہوں اگر یہی ہے اصول تو پھر اصول کیا ہے
میں سوچتا ہوں اگر یہی ہے کھیل تو پھر کھیل کیا ہے
میں ان سوالوں سے جانے کب سے الجھ رہا ہوں
میرے مخالف نے چال چل دی ہے
اور اب میری چل کے انتظار میں ہے!!!

بھوک

آنکھ کھل گئی میری
ہوگیا میں پھر زندہ
پیٹ کے اندھیروں سے
ذہن کے دھندلکوں تک
ایک سانپ کے جیسا
رینگتا خیال آیا
آج تیسرا دن ہے آج تیسرا دن ہے

اک عجیب خاموشی
منجمد ہے کمرے میں
ایک فرش اور اک چھت
اور چار دیواریں
مجھ سے بے تعلّق سب
سب مرے تماشائی
سامنے کی کھڑکی سے
تیز دھوپ کی کرنیں
آرہی ہیں بستر پر
چُبھ رہی ہیں چہرے پر
اس قدر نکیلی ہیں
جیسے رشتے داروں کے
طنز میری غربت پر
آنکھ کھل گئی میری
آج کھوکھلا ہوں میں
صرف خول باقی ہے
آج میرے بستر میں
لیٹا ہے مرا ڈھانچہ
اپنی مُردہ آنکھوں سے
دیکھتا ہے کمرے کو
آج تیسرا دن ہے آج تیسرا دن ہے

دوپہر کی گرمی میں
بے ارادہ قدموں سے
اک سڑک پہ چلتا ہوں
تنگ سی سڑک پر ہیں
دونوں سمت دُکانیں
خالی خالی آنکھوں سے
ہر دُکان کا تحتہ
صرف دیکھ سکتا ہوں
اب پڑھا نہیں جاتا
لوگ آتے جاتے ہیں
پاس سے گزرتے ہیں
پھر بھی کتنے دھندلے ہیں
سب ہیں جیسے بے چہرہ
شور ان دُکانوں کا
راہ چلتی اک گالی
ریڈیو کی آوازیں
دُور کی صدائیں ہیں
آرہی ہیں میلوں سے
جو بھی سن رہا ہوں میں
جو بھی دیکھتا ہوں میں
خواب جیسا لگتا ہے
ہے بھی اور نہیں بھی ہے
دوپہر کی گرمی میں
بے ارادہ قدموں سے
اک سڑک پہ چلتا ہوں
سامنے کے نُکّڑ پر
نل دکھائی دیتا ہے
سخت کیوں ہے یہ پانی
کیوں گلے میں پھنستا ہے
میرے پیٹ میں جیسے
گھونسہ ایک لگتا ہے
آرہا ہے چکّر سا
جسم پر پسینہ ہے
اب سکت نہیں باقی
آج تیسرا دن ہے آج تیسرا دن ہے

ہر طرف اندھیرا ہے
گھاٹ پر اکیلا ہوں
سیڑھیاں ہیں پتّھر کی
سیڑھیوں پہ لیٹا ہوں
اب میں اُٹھ نہیں سکتا
آسماں کو تکتا ہوں
آسماں کی تھالی میں
چاند ایک روٹی ہے
جھک رہی ہیں اب پلکیں
ڈوبتا ہے یہ منظر
ہے زمین گردش میں

میرے گھر میں چُولھا تھا
روز کھانا پَکتا تھا
روٹیاں سُنہری ہیں
گرم گرم یہ کھانا
کُھل نہیں رہی آنکھیں
کیا میں مرنے والا ہوں
ماں عجیب تھی میری
روزاپنے ہاتھوں سے
مجھ کو وہ کھلاتی تھی
کون سرد ہاتھوں سے
چھو رہا ہے چہرے کو
اک نوالا ہاتھی کا
اک نوالا گھوڑے کا
اک نوالا بھالو کا
موت ہے کہ بے ہوشی
جو بھی ہے غنیمت ہے
آج تیسرا دن تھا آج تیسرا دن تھا