ہر بے زباں کو شعلہ نوا کہ لیا کرو

ہر بے زباں کو شعلہ نوا کہ لیا کرو

یارو سکوت ہی کو صدا کہ لیا کرو

خود کو فریب دو ، کہ نہ ہو تلخ زندگی

ہر سنگ دل کو جانِ وفا کہ لیا کرو

گر چاہتے ہو خوش رہیں کچھ بندگانِ خاص

جتنے صنم ہیں ان کو خدا کہ لیا کرو

انسان کا اگر قد و قامت نہ بڑھ سکے

تم اُس کو نقصِ آب و ہوا کہ لیا کرو

اپنے لیے اب ایک ہی راہِ نجا ت ہے

ہر ظلم کو رضائے خدا کہ لیا کرو

لے دے کہ اب یہی ہے نشانِ ضیا قتیلؔ

جب دل جلے تو اُس کو دیا کہ لیا کرو

آخر وہ میرے قد کی بھی حد سے گزر گیا

آخر وہ میرے قد کی بھی حد سے گزر گیا

کل شام میں تو اپنے ہی سائے سے ڈر گیا

مٹھی میں بند کیا ہوا بچوں کے کھیل میں

جگنو کے ساتھ اس کا اجالا بھی مر گیا

کچھ ہی برس کے بعد تو اس سے ملا تھا میں

دیکھا جو میرا عکس تو آئینہ ڈر گیا

ایسا نہیں کہ غم نے بڑھا لی ہو اپنی عمر

موسم خوشی کا وقت سے پہلے گزر گیا

لکھنا مرے مزار کے کتبے پہ یہ حروف

"مرحوم زندگی کی حراست میں مر گیا"

اپنے ہاتھوں کی لکیروں میں بسا لو مجھ کو

اپنے ہاتھوں کی لکیروں میں بسا لو مجھ کو

میں ہوں تیرا نصیب اپنا بنا لو مجھ کو

مجھ سے تو پوچھنے آیا ہے وفا کے معانی

یہ تیری سادہ دلی مار نہ ڈالے مجھ کو

میں سمندر بھی ہوں، موتی بھی ہوں، غوطہ زن بھی

کوئی بھی نام میرا لے کر بلا لے مجھ کو

تو نے دیکھا نہیں آئینے سے آگے کچھ بھی

خود پرستی میں کہیں تو نہ گنوا لے مجھ کو

کل کی بات ہے میں اب سا رہوں یا نہ رہوں

جتنا جی چاہے تیرا آج ستا لے مجھ کو

خود کو کہیں بانٹ نہ ڈالوں دامن دامن

کر دیا تو نے اگر میرے حوالے مجھ کو

میں جو کانٹا ہوں تو چل مجھ سے بچا کر دامن

میں ہوں اگر پھول تو جوڑے میں سجا لے مجھ کو

میں کھلے در کے کسی گھر کا ہوں سامان پیارے

تو دبے پاؤں کبھی آ کر چرا لے مجھ کو

ترک الفت کی قسم بھی کوئی ہوتی ہے قسم

تو کبھی یاد تو کر بھلانے والے مجھ کو

بادہ پھر بادہ ہے میں زہر بھی پی جاؤں قتیل

شرط یہ ہے کوئی باہوں میں سنمبھالے مجھ کو